Siglir tar il cuntegn

Header

cuntegn

Evitar novas chaumas Persunal a terra da la Lufthansa survegn dapli paja

Il persunal a terra da la Lufthansa survegn dapli paja. La societad aviatica ed il sindicat Verdi èn sa cunvegnids d'augmentar la paja dals radund 20'000 emploiads ed emploiadas. Ils augments resguardian sur-proporziunal il persunal cun pajas bassas, ha communitgà la Lufthansa. Uschia po la Lufthansa evitar ulteriuras chaumas. L'emna passada avevan chaumas dal persunal a terra sfurzà da stritgar passa 1'000 sgols a Frankfurt ed a Minca.

Avevan tema d'ina nova chauma

Il sindicat Cockpit aveva laschà far ina consultaziun da la basa e bunamain 98% dals pilots e las pilotas eran s'exprimids per ina chauma, aveva communitgà il sindicat. Uschia era ina chauma dals 5'000 pilots e pilotas pussaivel. Il votum dals commembers e las commembras era in signal d'alarm drizzà a la Lufthansa, uschia il sindicat. Pervia da quella consultaziun han ins quintà cun bunas offertas en connex cun las tractativas da paja.

Gia l'emna passada hai dà ina chauma da persunal

Tar la Lufthansa è restada la gronda part dals aviuns avant radund in'emna a terra e quai permez il temp da vacanzas. La raschun era ina chauma dal persunal a terra ch'ha cumenzà la damaun. Cun quella ha il sindicat pretendì pajas pli autas suenter il schoc da corona. Per precauziun ha la societad stritgà passa 1'000 sgols da ed a Frankfurt e Minca. Plinavant ha la societad aviatica scusseglià a passagieras e passagiers da vegnir a las plazzas aviaticas, cunquai ch'ils spurtegls sajan serrads pervia da la chauma. Er tar la Swiss èn vegnids stritgads in tozzel sgols. 134'000 passagiers han uschia stuì midar lur plans da vacanzas u annullar quels dal tut. Gia il mardi eran crudadas ora almain 47 colliaziuns.

Pilots da la Swiss han refusà il contract collectiv da lavur

Tar la Swiss cuntinuescha la dispita per meglras cundiziuns da lavur per ils pilots e las pilotas. Las commembras ed ils commembers da l'uniun da pilots «Aeropers» han refusà il contract collectiv da lavur, che la societad aviatica Swiss ha negozià cun la suprastanza da l'uniun.

La Swiss deploreschia questa decisiun – il contract collectiv saja tenor ella stà equilibrà. Sch'i dat ussa ulteriuras negoziaziuns n'è betg cler. Quant stabil ch'il traffic aviatic saja durant las proximas emnas resta avert, scriva Aeropers. La Swiss ha dentant suttastritgà che la refusa dal GAV na vegnia ad avair naginas consequenzas per la stabilitat dal traffic aviatic.

Or da l'archiv:

video
Swiss disdescha il contract collectiv da lavur cun ils pilots
Or da Tagesschau dals 06.02.2021.
laschar ir. Durada: 2 minutas 50 Secundas.

Durant questa stad è RTR stà a far visita en la truscha da la plazza aviatica da Turitg:

video
A l'eroport: il pilot Sven Cadonau sur da ses job e sia passiun da sgular.
Or da sil punct dals 08.07.2022.
laschar ir. Durada: 2 minutas 6 Secundas.

RTR novitads 06:00

Artitgels legids il pli savens