Siglir tar il cuntegn

Header

cuntegn

Exteriur Explosiun a New York: Um arrestà accusà

L’American d’origin afgan era vegnì tschertgà suenter in’attatga a New York e suenter la scuverta da chargias explosivas construidas sez. Tenor medias americanas è el vegnì piglià a Linden (New Jersey). Entant partan ils investigaders uffizialmain d’ina raschun terroristica.

L'um suspectà ch'è vegnì arrestà suenter l'attatga cun bumba da la fin d'emna a New York vegn inculpà pervia da l'emprova d'assassinat. La procura publica da Union County ha entant accusà el pervia da la sajettada tar sia arrestaziun. Ils investigaders partan dal fatg che l'um da 28 onns cun las ragischs afganas haja agì sulet.

Medias rapportan da sajettim

Sco la polizia da New York ha confermà uffizialmain sa tracta quai tar l’um dal primsuspectà dals incaps a New York e New Jersey.

Medias americanas han rapportà ch’i ha dà sajettims durant l’arrest a Linden (New Jersey), ca. las 10:30 temp local. Dus policist sajan ed il suspectà vegnids blessads.

Raschun terroristica

Tar l'explosiun da la fin d'emna a New York cun 29 blessads datti tenor indicaziuns uffizialas tuttina indizis per ina raschun terroristica. Quai aveva communitgà il president da la metropola Bill de Blasio.

Il guvernatur dal stadi New York Andrew Cuomo aveva agiuntà en in’intervista cun l'emettur CBS ch'i vegnia supponì ina colliaziun cun l'exteriur. L'emprim aveva quai gì num ch'i na dettia nagins indizis per in'attatga da terror.

Naginas colliaziuns cun SI?

Tenor indicaziuns da l’emettur NBC n’han ils incaps a New York e New Jersey naginas directas colliaziuns cun il Stadi Islamic. NBC è sa referì sin pliras funtaunas d’investigaders.

I na possia betg vegnir excludì ch’il delinquent (u ils delinquents) saja stà inspirà dal SI. Dentant na dettia quai nagins indizis per ina sort incarica u missiun.

RR novitads 14:00 / 20:00

Artitgels legids il pli savens