En vista a las demonstraziuns dals adversaris da la vaccinaziun veglian ins mussar che quels sajan ina minoritad, han ditg ils organisaturs envers l'emettur «France Info». Ina gronda part da la populaziun veglia vegnir or da questa situaziun, en la quala ella saja bloccada dapi in onn e mez. Plinavant s'agiteschan ils organisaturs vid l'atmosfera ch'ils sceptichers da corona stgaffeschian. Pleds sco «resistenza » e «dictatura» vegnian malduvrads, quels pleds hajan dentant ina muntada.
Discurri ina giada cun ils Afgans davart dictatura e resistenza!
La sonda avevan puspè millis persunas en l'entir pajais demonstrà cunter novas reglas da corona. Las protestas na sa drizzian betg be cunter l'obligatori da sa laschar vaccinar en il sectur da sanadad, mabain er cunter l'uschenumnà pass da sanadad, ch'è sumegliant al certificat da Covid svizzer. Quel è necessari per ir a baiver café e in restaurant, ir cun tren u per sgular.
