Frantscha - Sesida da crisa pervia da tumults cun il president
Pervi dals tumults en l’entir pajais vul il president franzos Emmanuel Macron s’inscuntrar mardi cun passa 220 presidentas e presidents da citads e da vischnancas.
En emprima lingia veglia il president Emmanuel Macron s'entupar cun presidentas e presidents da vischnancas che sajan en spezial pertutgadas dals tumults. Dentant veglia Macron gia glindesdi far sesidas da crisa: El s'entaupia cun la presidenta da l’assamblea naziunala e cun il president dal senat.
Tumults main gronds la dumengia saira
Avrir la boxSerrar la box
Dapi che la polizia ha sajettà ad in giuven um en il chau il mardi passà, hai dà mintga saira protests. La polizia franzosa ha arrestà mintgamai fin a 1'400 persunas per notg. Dumengia saira hai dà fin las 01:30 mo 29 arrestaziuns.
Pervi dals tumults ha il president franzos schon stuì spustar ina visita statala en Germania.
La raschun per ils protests en Frantscha è la mort d'in giuven da 17 onns ch'è vegnì sajettà giu d'in policist durant ina controlla da traffic en l’aglomeraziun da Paris a Nanterre. Envers SRF ha in sociolog ditg davart ils cravals: «La giuventetgna ha perdì la fidanza en il stadi».
