Millis policistas e commembers da l'armada sa preparan dumengia a Londra sin il funeral da Queen Elizabeth II che ha lieu glindesdi. I vegnia ad esser in dals pli gronds eveniments ch'ha lieu en la chapitala da l'Engalterra.
Il schef da las autoritads da transport da Londra quintia damaun cun fin ad in milliun persunas, sco che l'agentura da novitads PA ha rapportà. I dettia bleras adattaziuns en il traffic public. Per pudair surmuntar la sfida vegnian mess en bus e trens supplementars, fermadas da bus e staziuns da la metro vegnian per part serradas ed er cun sviaments ed interrupziuns stoppian las passagieras ed ils passagiers quintar. Il persunal lavuria cun tutta forza per che la glieud possia vegnir transportada tras la citad.
Fin glindesdi a bun'ura possian las Britas ed ils Brits prender cumià da la regina en il parlament a Londra. Il funeral statal da la Queen cumenza lura da mezdi en la Westminster Abbey.
