Siglir tar il cuntegn
cuntegn

Exteriur Gaza: Puspè escalaziun da la violenza

Tar l'escalaziun novissima da la violenza tranter l'armada israeliana e forzas palestinaisas èn mortas quatter persunas. Quai rapporta l'agentura da novitads svizra SDA.

Fieu sur Gaza en la notg.
Legenda: Las rachetas han tutgà la centrala dals servetschs d’infurmaziuns da la Hamas. Keystone

Pervi da las rachetas israelianas sajan vegnids mazzads trais Palestinais, communitgescha il ministeri da sanadad en la Strivla da Gaza. En l’Israel saja mort in um pervi dad ina racheta sajettada davent da Gaza.

Sinaquai haja l’armada israeliana attatgà pli che 20 posiziuns da la Hamas, la forza guvernamentala radical-islama en la Strivla da Gaza, e da la gruppa palestinaisa Dschihad islamic. Tar quellas attatgas saja er vegnida tutgada la centrala dals servetschs d’infurmaziuns da la Hamas.

La centrala attatgada saja là nua ch’ils agents survegnian infurmaziuns per attatgas sin Israel e sco il militar scriva vinavant sin il servetsch da novitads curt twitter saja quai la vendetga per las dapli che 300 rachetas sajettadas ord la Strivla da Gaza, descriva la SDA la novissima escalaziun en ed enturn la Strivla da Gaza.

Il messadi curt da l'armada israeliana:

La Hamas ha uss pretais da las Naziuns Unidas e dal cussegl da segirezza dad intervegnir tar l'armada israeliana pervia che civilists vegnan attatgads. L'UE e las Naziuns Unidas han admonì tuttas duas varts dad esser precautas.

RR novitads 06:00