Il socialdemocrat Boris Pistorius daventa nov minister da defensiun tudestg. Il chancelier federal Olaf Scholz ha nominà el sco successur da Christine Lambrecht, communitgescha il pledader da la regenza. Pistorius ha 62 onns ed è gia en la terza perioda d'uffizi minister da l'intern dal stadi federativ Niedersachsen. Avant era el stà durant set onns president da la citad dad Osnabrück. Pistorius vegn saramentà la gievgia.
Focus saja stà memia fitg sin la persuna, e betg sin il tema
L'anteriura ministra da defensiun tudestga Christine Lambrecht ha dumandà ier il chancelier Olaf Scholz per la demissiun. Che las medias sajan sa focussadas sin sia persuna ils davos mais, haja bunamain fatg impussibel da rapportar a moda neutrala da l'armada e da temas militars. Perquai saja ella sa decidida da metter a disposiziun ses post, uschia Lambrecht vinavant.
Dapi mais en la critica
Gia il venderdi avevan pliras medias tudestgas rapportà che Lambrecht vegnia a sa retrair. La politicra da la Partida socialdemocratica è stada dapi plirs mais en la critica, tranter auter pervi dal retard tar la cumpra da nov material per l'armada. Plinavant manchia ad ella la savida speziala necessaria. Era ses cumportament public ha chaschunà irritaziuns. Uschia ha ella prendì cun ella ses figl en in helicopter da l'armada.
Dacurt aveva in video cun in messadi per il nov onn chaschunà irritaziuns. En quel video discurra Lambrecht davart la guerra en l'Ucraina, fertant ch'ins auda fieu artifizial.
Avant il post da ministra da defensiun è Christine Lambrecht stada ministra da giustia, en la regenza d'Angela Merkel.
