En la Germània ha il di da partida da la SPD approvà il contract da coaliziun planisà. Da passa 600 delegadas ed delegads da la SPD han be set vuschà cunter l’allianza da regenza cun ils Verds e la FDP. Damaun vuscha lura il di da partida da la FDP davart il contract da coaliziun. Ils Verds consulteschan il mument lur commembers e vegnian a communitgar il resultat probablamain il glindesdì.
Il pli baud lura èsi cler, sche la SPD, ils Verds e la FDP vegnan ad esser per l’emprima giada ensemen al timun da la regenza tudestga. La mesemna è planisà d'eleger Olaf Scholz sco novavel chancelier tudestg. El fiss il quart schef da regenza da la SPD, suenter Willi Brandt, Helmut Schmidt e Gerhard Schröder.
