Las dimensiuns dals donns pervi dals incendis da guaud en il nord dad Athen en Grezia vegnan adina pli cleras. Sco medias localas rapportan, èn dapli che 300 chasas ed edifizis dad industria ars. Anc betg cler saja il donn ecologic, hai gì num.
Provediment d'electricitad ed aua ha patì
L’emettur da televisiun Skai ha rapportà, ch’i dettia il mument difficultads surtut cun il provediment da forza electrica. I vegnia a cuzzar enfin duas emnas enfin ch’i dettia puspè dapertut electricitad. Almain 1’300 pitgas da forza electrica sajan brischadas u donnegiadas e stoppian vegnir remplazzadas. Era il provediment d'aua n'è anc betg dal tut restabilì. Pertutgads sajan oravant tut aglomeraziuns en il nord d'Aten.