Il dumber d’unfrendas dals incendis da guaud e da chagliom sin l’insla hawaiiana da Maui è s’augmentà sin almain 80. Quai han communitgà las autoritads localas. Entant cuntinueschian las lavurs da stizzar. Cunzunt pertutgada dals incendis desastrus è la citad Lahaina en il vest da l’insla. Las flommas han devastà la citad ch’è fitg populara tar turists. Tenor las autoritads èn almain 1'000 bajetgs vegnids destruids. Ils incendis eran ruts or mardi passà. Setgira e ferms vents hajan envidà ils incendis. Per il stadi federativ da Hawaii vala il cas da catastrofa.
Renfatschas a las autoritads
Suenter ils incendis da guaud e da chagliom en il stadi federativ da Hawaii duai la rolla da las autoritads localas vegnir examinada. Ina tala examinaziun saja gia vegnida instradada, ha communitgà la procuratura publica generala ch’è responsabla en chaussa. Concret duajan las decisiuns avant e durant ils incendis desastrus vegnir examinads. A las autoritads localas vegn renfatschà d’avair reagì memia plaun. Per exempel n’haja dà nagin alarm da sirenas sin l’insla Maui ch’è cunzunt pertutgada da la catastrofa.
11-08-2023
Sin l'insla Maui che tutga tar Hawaii brischi. Fin la gievgia saira (temp local) haja dà 55 morts, rapportan las autoritads regiunalas. Els quintian cun ulteriuras unfrendas, almain 20 persunas sajan grevblessadas ed en stadi critic. Era n'hajan ins nagina survista quantas persunas che sajan sparidas perquai che la rait da telefon saja collabada.
Ils incendis da guaud han per exempel brischà il lieu Lahaina ch'è in lieu frequentà da blers turists. Sco il guvernatur da Hawaii Josh Green di, sajan praticamain tut ils edifizis destruids e stoppian puspè vegnir construids. Tenor medias èn sis alloschis d'urgenza en funcziun e radund 30'000 visitadras e visitaders sajan vegnidas evacuadas da l'insla.
