Las autoritads russas dumbran en total passa 170 incendis sin 125'000 hectaras. En las regiuns ch’èn mo grev accessiblas èsi difficil da cumbatter ils incendis. 121 abitadis èn tenor indicaziuns fitg datiers da la zona nua ch'il fim che donnegia la sanada è fitg ferm. Las persunas pateschan dapi plirs dis da las consequenzas dals incendis. Els planschan da mal il chau e difficultads da respirar.
Voluntaris gidan da stizzar il fieu
Millis da voluntaris emprovan da cumbatter ils fieus en las regiuns. Fin uss èn radund 30'000 kilometers quadrat guaud vegnids destruids. Quai correspunda a la surfatscha da la Belgia. En la Sibiria datti adina puspè incendis da guaud durant la stad. D'ina vart pervia da la chalira e la sitgira. Da l'autra vart fan Russ tradiziunalmain fieu da champ malgrà tavlas d'avertiment pervi da privel d'incendis da guaud. I dat inquisiziuns pervi d'incendi intenziunà.
RR novitads 18:00