Internaziunal - Demonstraziun a Turitg cunter la regenza da l'Iran

Tranter 2'000 e 3'000 persunas han demonstrà a Turitg per ils interess dal moviment da protest en l'Iran e cunter la politica repressiva da la regenza iranaisa. Crititgà han las demonstrantas ed ils demonstrants era la tenuta da la Svizra en connex cun l'Iran. Tenor in fotograf da l'agentura da novitads Keystone-SDA han demonstrà 2'000 persunas, tenor ils organisaturs, l'organisaziun Free Iran Switzerland, 3'000. Quella pretenda dal Cussegl federal da surpigliar las sancziuns che l'Uniun Europeica ha decis cunter la regenza a Teheran.