Siglir tar il cuntegn
Inhalt

Exteriur Iran smanatscha d'augmentar uran

Il minister da l’exteriur iranais ha smanatschà a l’Uniun europeica dad augmentar lur concentraziun d'uran. Quai sche l’UE reageschia vinavant uschè passiv, suenter ch’ils Stadis Unids eran sortids da la cunvegna d’atom.

Purtret da Sarif.
Legenda: Mohamed Dschawad Sarif, il minister da l'exteriur da l'Iran. Keystone

Ils Europeans ed ils ulteriurs ch’hajan suttascrit la cunvegna, stoppian agir, per cumpensar las consequenzas da las sancziuns americanas, ha ditg il minister iranais envers il magazin da novitads tudestg «Der Spiegel». Il med da duvrar per far quai sajan ieli e bancas. L'Iran vegnia a reagir sche la balantscha tranter dar e pigliar na constettia betg pli. Per far quai na stoppia l'Iran betg dar si la cunvegna da clima. Ina pussaivladad fissia da realisar quella be a moda reducida. Ina pussaivladad fiss da puspè augmentar la concentraziun dad uran.

Il minister da l'exteriur supplitgà ils stadis da l'Uniun Europeica da far diever dal «Blocking Statute» e da chastiar interpresas che sa retiran da fatschentas cun l'Iran pervi da las sancziuns dals Stadis Unids. Ils Europeans stoppian sa decider sch'els veglian era agir e betg be discurrer. I saja ina dumonda da sa laschar al dictat american u betg.

RR novitads 12:00