Siglir tar il cuntegn

Header

Navigaziun

Ina dunna guarda il lieu, ornà cun flurs e cranzs.
Legenda: Londonderry: Commemoraziun al lieu, nua che la schurnalista Lyra McKee era vegnida sajetta la gievgia avant Pasca. Keystone
cuntegn

Exteriur Irlanda dal Nord – schurnalista mazzada «per sbagl»

La schurnalista saja vegnida sajettada «per sbagl» da la gruppaziun Nova IRA. Quai ha la gruppaziun fatg a savair sez.

La brev da confess da la gruppa militanta Nova IRA è vegnida publitgada dad ina gasetta irlandaisa. Lien scriva la gruppa ch'ella haja mazzà la schurnalista Lyra McKee (29) per sbagl.

Nova IRA: «Cumplainas e sinceras stgisas»

«Tragicamain» saja ella vegnida mazzada cun quai ch'ella steva durant ils cravals en la citad nord-irlandaisa da Londonderry sper la polizia – sper las «forzas ostilas» co che la Nova IRA nomna la polizia en sia brev.

La Nova IRA porschia «cumplainas e sinceras stgisas» als confamigliars da la schurnalista e scriva da vulair dar en avegnir «la pli gronda tgira».

Cravals naziunalistics s'inflammeschan puspè

Lyra McKee era vegnida mazzada la gievgia passada la saira durant cravals violents. Quels eran escalads en ina part da la citad che vala sco center dals naziunalists irlandais.

Dus umens ch'eran vegnids arrestads en connex cun il mazzament èn puspè vegnids relaschads da l'arrest, rapportan las agenturas da novitads.

La sortida da l'UE da la Gronda Britannia aveva adina puspè sveglià la tema ch'il conflict tranter gruppas pro-irlandaisas e pro-britannicas en la provinza britannica pudess puspè escalar.

RR novitads 06:00