Il politicher da dretga Avigdor Liebermann (60) reageschia uschia sin la pausa da cumbat planisada tranter l’Israel e l’organisaziun radical-islama Hamas, ha Liebermann communitgà avant las medias.
Protest cunter «capitulaziun avant il terror»
Quai saja ina capitulaziun avant il terror ha ditg Liebermann, ch'è il schef da la partida ultranaziunalista Beitenu. Auter sco il primminister Benjamin Netanjahu era el per cuntinuar las attatgas israelianas sin puncts da paisa da la Hamas ed autras gruppas radical-islamas en la Strivla da Gaza.
Avigdor Liebermann è stà dapi il matg 2016 minister da defensiun. Ad interim vegn el substituì da Netanjahu.
Lebermann: Uss ha da decider l'electur «da la lingia gista»
Liebermann ha appellà a tschellas fracziuns entaifer da la regenza da s'engaschar uss per novas elecziuns spertas. Las proximas elecziuns regularas èn prevesidas per il november 2019.
Tar la novissima escalaziun da la violenza sa tractia tenor in pledader da l'armada da las attatgas las pli violentas sin Israel dapi la guerra da Gaza 2014.
Ord la Strivla da Gaza sajan vegnidas sajettadas 460 rachetas e granatas. Ils Israelis hajan respundì tenor atgnas indicaziuns cun attatgas sin 160 miras militaras, scrivan las agenturas.
RR novitads 15:00
