L'Italia introducescha in obligatori da sa laschar vaccinar cunter corona, quai per persunas da 50 onns ensi. Quai ha la regenza decidì mesemna saira a Roma. Quest obligatori vala a partir dals 15 da favrer 2022.
L'Italia è uschia in dals paucs pajais en l'Europa che fa obligatorica la virola per ina gronda part da la populaziun. E tgi che na sa tegna betg vid questa regla ristga in chasti da 600 fin 1'500 euros. La regenza taliana aveva gia avant introducì in obligatori da sa laschar virolar per scolastas ed ils scolasts, e per persunas dal sectur da sanadad.
Decisiun ha chaschunà charplina
Las mesiras ch'il cabinet ha uss decidì, han chaschunà charplina en la coaliziun dal schef da regenza Mario Draghi. La mesemna ha l'Italia registrà bunamain 190'000 infecziuns novas e 231 morts entaifer 24 uras, la pli auta cifra en l'Italia dapi l'entschatta da la pandemia.
