Ils plans davart las finanzas per il proxim onn da la regenza Meloni muntan cunzunt da far blers debits. Tar il sustegn da dischoccupads e dischoccupadas vul ella dentant spargnar.
Ils uschènumnads «daners da burgais» eran vegnids introducids da la regenza avant Meloni. I sa tracta d'ina sort paja minimala per dischoccupads u persunas che na pon betg viver mo da lur paja. Critichers e criticras din tranter auter ch'i vegnia pli pauc attractiv da lavurar sch'i dettia quels daners. Plinavant promovian els uschia da lavurar nair.
Il plan da Meloni èsi da anc pajar ils daners fin 2023, e maximalmain 8 mais ditg per persuna. 2024 na duai lura nagin pli survegnir sustegn. Per persunas veglias che retiran «daners da burgais» ha Meloni annunzià che mintga cas vegn examinà da moda precisa.
Regenza da Meloni ha preschentà preventiv
Per reagir sin ils auts pretschs d'energia e l'inflaziun ha Meloni annunzià da prender a mauns 35 milliardas euros, la gronda part cun far debits. Il sboz dal preventiv vul impunder passa 21 milliardas euros per sustegnair chasadas ed interpresas.
Ils rabats da tancar vul la regenza reducir. Fin uss ha la regenza subvenziunà carburants cun 30 cents per liter, uss duai quai anc esser 15. Cun quai duessan ils pretschs da carburant tar ils tancadis talians s'augmentar.
Il preventiv sto anc vegnì approvà dal parlament, en quala che l'allianza da partidas dretga da Meloni ha ina maioritad en omaduas chombras.
