La Crusch cotschna svizra trametta in team d'agid en il Maroc. Ils otg spezialists duain gidar la glieud en il territori dal terratrembel a survegnir in suttetg e procurar per aua e da mangiar. La societad maroccana da la Mesa-glina cotschna ha dumandà sia organisaziun-sora en Svizra per agid.
Il terratrembel da la notg da venderdi sin sonda haja gì ina fermezza da 6,8 sin la scala da Richter. L’epicenter saja stà datiers da la citad Marrakesch en ina profunditad da bunamain 20 kilometers. Quai ha communitgà il servetsch seismologic dals Stadis Unids «USGS». Pervi dal terratrembel en il Maroc han millis persunas pers lur dachasa. La Crusch cotschna discurra d'enturn 2'800 morts.
Agid internaziunal
Entant ha il Maroc acceptà l’agid da quatter pajais, numnadamain da la Spagna, il Catar, la Gronda Britannia e l’Arabia Saudita. L'agid da la Frantscha ha il pajais cun in'istorgia da colonisaziun dentant refusà. La Svizra n’ha tenor il Departament d’affars exteriurs anc betg survegnì ina resposta sin sia offerta da gidar.
La schanza d'ina tala stremblida en questa regiun saja fitg pitschna. Dapi passa 120 onns n’haja en il conturn da 500 kilometers betg pli dà in uschè ferm terratrembel.
Il terratrembel en il Maroc è era stà da sentir en il sid da la Spagna e dal Portugal. Igl haja dà plirs telefons da persunas preoccupadas. Davart donns na san las autoritads dentant nagut.
