Suenter las grevas malauras en la Libia crescha il dumber d’unfrendas vinavant. L’ONU quinta en ses ultim rapport cun almain 11’300 unfrendas. Passa 10'000 persunas sajan anc sparidas. En pli hajan las auas transportà minas e muniziun en regiuns che n’eran fin qua betg periclitadas. En consequenza s’augmentia il risico che talas minas explodeschian en il pajais ch’ha sur onns patì da conflicts armadas.
100'000 umans dovran urgentamain agid umanitar
Suenter las grevas malauras en Libia dovran 100'000 umans urgentamain agid. Quai scriva il Biro per l’agid umanitar da l’ONU. Per ils 250'000 umans che sajan il pli pertutgà da las auas grondas dovria agid immediat per radund 71 milliuns dollars. Tut en tut vivian bunamain 900'000 umans en las regiuns pertutgadas.
-
Bild 1 von 6. La citad da Dierna . Bildquelle: Keystone.
-
Bild 2 von 6. Bildquelle: Keystone.
-
Bild 3 von 6. Bildquelle: Keystone.
-
Bild 4 von 6. Bildquelle: Keystone.
-
Bild 5 von 6. Bildquelle: Keystone.
-
Bild 6 von 6. Bildquelle: Keystone.
Il stemprà «Daniel» ha furià en il pajais la fin da l’emna passada. Cunzunt pertutgada è la citad Darna. Fin uss ha la regenza che controllescha l’ost dal pajais confermà 5’300 unfrendas. Las autoritads locals quintan dentant cun enfin 20'000 unfrendas.
Agid umanitar
Per organisaziuns d'agid èsi grev da vegnir cun rauba d'agid en il pajais che patescha d'ina guerra civila. La Svizra presta sustegn finanzial enstagl da trametter corps umanitars. L’organisaziun d’agid «Medis senza cunfin» trametta sustegn, la gievgia arrivia in team d’urgenza cun logisticras e logistichers e persunal medicinal en la citad da Darna, scriva l’organisaziun d’agid sin la plattafurma X.
Mesemna aveva gia l’ONU annunzià agid umanitar per las regiuns pertutgadas. Tenor la regenza che controllescha l’ost dal pajais èn mortas passa 5’300 persunas pervi da las inundaziuns. 10’000 persunas sajan anc sparidas.