In rapport che Washington ha publitgà, di che Mohammed bin Salmaan saja stà involvì directamain en il mazzament dal schurnalist Dschamal Khashoggi. Ils regents a Riad han snegà che Salmaan haja da far x-insatge cun il mazzament.
In commando spezial da l'Arabia Saudita aveva mazzà Khashoggi l'october 2018 en il consulat saudit ad Istanbul. Quel era en l'exil en ils Stadis Undis e crititgava adina puspè massivamain il regent saudit Salmaan.
En la Tirchia è in process pervi dal mazzament da Khashoggi anc vid marschar. Ina dretgira saudita aveva sentenzià l'atun passà tschintg accusads a 20 onns praschun ed uschia annullà la paina da mort per ils tschintg umens. Gia avant aveva la famiglia da Khashoggi declerà ch'els perdunian als delinquents.
En consequenza dal rapport publitgà, relaschan ils Stadis Unids restricziuns d'entrar en il pajais encunter 76 burgais saudits.
