En ils Stadis Unids daventa corona in tema per il tribunal suprem. Concret vul il pli aut tribunal dals Stadis Unids da l'America prender sut la marella l’obligatori da testar e vaccinar ch’il president Joe Biden ha planisà per firmas pli grondas. Ils 7 da schaner dettia ina audiziun en chaussa, ha annunzià il tribunal.
Dacurt aveva ina dretgira d’appellaziun puspè mess en vigur las reglas ch’il president aveva decis. Ordavant aveva in’autra dretgira abolì quellas. Il president american vul tranter auter ch’ils emploiads da firmas pli grondas stoppian esser cumplainamain vaccinads fin ils 4 da schaner.
Suenter che l'administraziun dal president american democrat Joe Biden aveva decretà in obligatori da testar e vaccinar per firmas grondas e per il persunal dal sectur da sanadad, eran plirs stadis federativs regids dals republicans, pliras firmas ed organisaziun regligiusas sa dustads.