Dumengia suentermezdi è stada sin il glatscher dal Pizol sin 2’800 meters sur mar ina festa commemorativa per ils glatschers che svaneschan. Radund 250 persunas han fatg part da la festa. Quest’acziun ha tranter auter instradà l’organisaziun per la protecziun da l’ambient Greenpeace.
En ina communicaziun hai num ch’il glatscher dal Pizol vegnia a sparir fin il 2030. Il glatscher haja pers uschè bler substanza ch'i restia uss mo anc ina surfatscha en la grondezza da quatter plazzas da ballape, ha ditg il geolog Matthias Huss da la ETH Turitg. El represchentia blers ulteriurs glatschers pli pitschens che pateschan da la midada dal clima.
Stgaudament dal clima
Ils onns tranter il 2015 e il 2019 èn para stads ils pli chauds dapi che las temperaturas vegnan mesiradas. Quai mussa il nov rapport davart il clima da l’organisaziun meteorologica mundiala WMO.
La temperatura media globala saja stada quels onns per 1,1 grads sur quella dal temp preindustrial. Per tegnair l’augment da la temperatura media fin il 2100 sut 2 grads stoppian ins triplar las stentas per reducir las emissiuns da CO2, ha ditg il directur general da la WMO.
RR novitads 15:00
