Siglir tar il cuntegn

Header

cuntegn

Midterms en ils Stadis Unids Republicans han maioritad en la chombra dals represchentants

Tar las elecziuns intermediaras en ils Stadis Unids da l'America han ils democrats dal president Joe Biden pers lur maioritad en la chasa dals represchentants. Ils republicans cuntanschan la maioritad absoluta da 218 sezs, necessaria per controllar la chombra gronda dal parlament.

Ils uschènumnads Midterms han lieu suenter l'emprima mesadad da la perioda d'uffizi dal president. Ellas valan mintgamai sco test per il president en uffizi. Quasi adina perda la partida a la testa: Ils republicans han per exempel pers sut Donald Trump 40 sezs be en la chombra gronda – ils democrats sut Barack Obama perfin pers 63.

Ils democrats han pers quest onn almain 10 sezs. Set votaziuns èn anc betg dumbradas ora. Tenor CNN, NBC e pliras agenturas da novitads han ils democrats cun quai pers maioritad en la chombra da represchentants. Quai sin fundament da dumbraziuns da vuschs e prognosas. Fin uss avevan ils democrats 220 sezs ed ils republicans 212.

Manader da la maioritad republicana en la chombra da represchentants Kevin McCarthy suenter la victoria tar ils Midterm.
Legenda: Manader da la maioritad republicana en la chombra da represchentants Kevin McCarthy suenter la victoria tar ils Midterms. Reuters

Cunquai daventi pli difficil per il president democratic Joe Biden da reger. Novas leschas ston passar la chombra dals represchentants e la maioritad republicana pudess bloccar quellas.

Tge che vegn tut elegì tar ils midterms

Avrir la box Serrar la box

Tar ils Midterms vegn elegì sin nivel federal, statal e local. Las pli impurtantas elecziuns èn:

  • Tut ils 435 mandats da la chombra dals represchentants (la chombra gronda dal congress)
  • 35 dals 100 sezs dal senat (la chombra pitschna dal congress)
  • En 36 da 50 stadis vegn elegì il guvernatur u la guvernatura
  • En prest tut ils stadis vegn elegì in nov parlament

Er in test per la popularitad da Trump

Normalmain valan ils Midterms sco ina sort referendum per il president, questa giada è dentant er l'anteriur president Donald Trump fitg preschent. President Biden ha avertì pliras giadas che Trump e ses sustegniders sajan in privel per la democrazia e ch'els duain vegnir refusads a l'urna. Blers candidats e candidatas dal republicans sustegnan Trump e mettan en dubi la victoria da Joe Biden da l'onn 2020.

Ina victoria per ils republicans vala er sco cumenzament da la campagna electorala da Donald Trump per las elecziuns presidenzialas da l'onn 2024. Las elecziuns n'èn pia betg mo in referendum davart il president actual Joe Biden – dentant er ina sort referendum davart l'avegnir da Trump.

Democrats defendan controlla dal Senat

Ils democrats vegnan a controllar vinavant il senat. Suenter che l’anteriur astronaut Mark Kelly ha defendì ses sez impurtant en il stadi Arizona, ha ussa er Catherine Cortez Masto gudagnà l'elecziun contestada a Nevada.

Cun quai han ils democrats segirà 50 dals 100 sezs dal senat. Quai basta per controllar la chombra pitschna, cun quai che vicepresidenta Kamala Harris ha la vusch da tagl. Ils republicans han 49 sezs.

En il stadi Georgia datti ils 6 da december ina elecziun decisiva per l'ultim sez, damai che nagin dals candidats ha gì dapli che 50% da las vuschs.

L'economia e dretg d'abort èn impurtants facturs

Il tema che occupa tenor retschertgas ils pli blers americans ed americanas èn ils pretschs che creschan. L'inflaziun era il settember sin 8,2%. Blers dattan la culpa per quai als democrats e spezialmain al president Joe Biden. Ils republicans speran da profitar da quai fatg. Persuenter speran ils democrats da far vuschs tar dunnas per il dretg d'abort, suenter che quel è vegnì annullà dal tribunal suprem.

RTR actualitad 12:00

Artitgels legids il pli savens

Scrollar a sanestra Scrollar a dretga