Il «Starship» da l'interpresa Spacex ha era fallà il segund sgol da test. Omadus stgalims dal pli grond sistem da rachetas spazialas ch'è insacura vegnì bajegià èn explodids curt suenter il start. La racheta nunequipada era partida da la staziun spaziala en il stadi federativ american Texas. Quai han communitgà ils commentaturs dal live-stream da l'interpresa astronautica Spacex.
Gia tar in emprim sgol da test l'avrigl era in «Starship» explodì curt suenter la partenza. Tar quest test èn ussa dentant vegnids cuntanschids intgins terms impurtants dapli: Paucas minutas suenter la partenza èn ils dus stgalims da racheta sa separads. La part sut da la racheta è dentant explodida curt suenter e n'è betg atterrà sco planisà en il Golf da Mexico.
La part sura da la racheta è sgulà in temp pli lunsch. Lura hai dentant gì num ch'er ella saja explodida. Atgnamain avess ella stuì sgular vinavant en l'autezza e suenter var in'ura e mesa sa tschentar en il Pacific.
Test fallà gia l'avrigl
Mez avrigl era per l'emprima giada partì in «Starship» ad in test nunequipà – e 4 minutas pli tard explodì. Il milliardari Elon Musk na veseva en quel dentant nagina rebattida, mabain «in cumenzament carmalant da testar».
L'autoritad da surveglianza aviatica dals Stadis Unids FAA aveva intercurì l'incident e numnà sco cundiziun per ina tala proxima partenza da test numerusas mesiras da meglieraziun. Spacex ha communitgà d'avair realisà numerusas meglieraziuns e midadas. La FAA aveva sinaquai dà glisch verda.
120 meters transporteschan 100 tonnas
Il «Starship» consista dal booster da circa 70 meters lunghezza cun il num «Super Heavy» e da la part sura da circa 50 meters che vegn medemamain numnà «Starship». La racheta duai pussibilitar missiuns pretensiusas sin la glina e sin il Mars. Il sistem è construì uschia che la nav spaziala e la racheta pon puspè vegnir reutilisadas suenter il return sin la terra. Il sistem da totalmain var 120 meters lunghezza duai pudair transportar en l’avegnir bler dapli che 100 tonnas vitgira. Cun il «Starship» vul la Nasa manar astronauts sin la glina. Spacex spera da pudair vegnir in di enfin sin il Mars.
