Suenter la mort d'in jogger en la Val di Sole en la regiun Trentino ha il president da la regiun decretà da mazzar ina ursa. Ella saja la culpa per la mort da l'um. Er in auter «urs da problems» ha el vulì laschar sajettar.
Cunter quai ha l'organisaziun d'ambient LAV purtà plant. Las blessuras da l'um inditgeschian ch'in urs pli grond haja mazzà el. La dretgira ha sin quai dà raschun ad ella: il privel dals dus urs na saja betg mussà si avunda. Uss datti ulteriuras retschertgas e audiziuns fin il december.
Ursa è en center per animals selvadis
Suenter la mort dal jogger è l'animal vegnì chattà en la Val Meledrio. L'ursa, che ha il num JJ4 u er Gaia, è vegnida narcotisada e transportada en in center per animals selvadis. L'organisaziun d'ambient che ha purtà plant cunter la decisiun da cuppar l'ursa ha uss ditg ch'ella veglia purtar l'ursa en in reservat. Ella veglia er pajar ils custs per quai.
Discussiuns en la regiun
Dapi che l'um è vegnì mazzà vegn discutà en l'Italia en maniera intensiva davart la convivenza dad urs ed umans. La provinza vul smesar il dumber dad urs. Actualmain suppon'ins ch'enturn 70 urs vivian en la regiun.
Autras persunas han s'engaschà per la vita da l'ursa. Organisaziuns d'ambient han pretendì dapli sensibilitad per ils animals e pretendan gia daditg da drizzar en corridors per quels.
L'um mort era vegnì chattà la gievgia avant Pasca. El n'era betg turnà a chasa mesemna suenter ch'el era ì a currer en la Val di Sole en il Tirol. Las blessuras han inditgà in'attatga d'in urs, ed ins haja chattà la DNA da l'ursa JJ4.
