Mortoris tras il virus - Passa 6 milliuns persunas mortas pervia corona

Dapi l’entschatta da la pandemia avant dus onns èn passa sis milliuns umans morts en connex cun corona. Quai rapporta l’universitad da Johns Hopkins en ils Stadis Unids da l'America. 447 milliuns umans sajan s’infectads cumprovadamain cun il virus. Ultra da quai sajan vegnidas dadas sin l’entir mund passa 10,6 milliardas dosas da vaccin. La pagina d’internet da l’universitad renumada a Baltimore vegn regularmain actualisada e mussa in stan ch’è in zic pli aut che las cifras uffizialas da l’Organisaziun mundiala da la sanadad WHO.