50 onns suenter l'ultima tschentada sin la glina parta il glindesdi puspè ina racheta tar il trabant da la terra. Tar la partenza a Cape Caneveral a Florida vegni spetgà fin 200'000 aspectaturas ed aspectaturs. L'emprim sgol da la missiun Artemis da la NASA – l'agenzia spaziala da l'America – vegn fatg senza astronauts a bord, duai dentant esser il start per puspè returnar cun persunas sin la glina.
La finamira da l'emprim sgol è da testar la racheta e la capsla Orion sut cundiziuns realisticas. Enstagl dad astronauts hai poppas a bord che mesiran differents parameters durant ils 42 dis da viadi – e duain era far in selfie cun la glina.
Per la NASA è la missiun da l'Artemis 1, ch'è vegnida preparada sur 10 onns, da muntada simbolica. La pli ferma racheta dal mund duai mussar che la NASA saja anc adina capabla da concurrenzar cun la China u cun la SpaceX dad Elon Musk.
