La cunvegna d'armistizi tranter ils Palestinais ed ils Israelians duai entrar en vigur il glindesdi a bun'ura. Quai tenor indicaziuns dals Palestinais. Sco intermediatur tranter ils dus pievels duai l'Egipta avair agì. Ina posiziun uffiziala dals Israelians na datti anc betg.
Plirs morts tar attatgas cun rachetas
Tenor indicaziuns da l'armada israeliana han Palestinais militants fatg pli che 650 attatgas cun rachetas sin lieus israelians dapi la sonda passada. Quatter civilists sajan morts tar las attatgas.
Israel ha sinaquai reagì cun cunterattatgas e bumbardà pli che 250 lieus en la strivla da la costa. Latiers èn pliras chasas vegnidas destruidas. Tranter quellas er l'edifizi da l'autoritad per la segirezza da la Hamas. Tar quellas attatgas èn 19 Palestinais morts.
RR novitads 08:00