Per vegnir liberà da la reputaziun sco paradis da taglia stoppia la Svizra demussar che nagins daners d’omettents da taglia culan tras il pajais. Exact quai na possia la Svizra betg demussar, crititgescha Paul Tang en in'intervista cun la gasetta da la Svizra franzosa «Le Temp». Paul Tang presidiescha en il parlament da l'UE il gremi per dumondas da taglia.
Vinavant crititgescha el, ch'i saja anc adina memia simpel da mascrar l'identitad da quels che nizzegian trics da finanzas. Ed in ulteriur problem saja ch'advocats n'èn betg suttamess a l'obligaziun da diligenza.
La Svizra saja anc adina in paradis da taglia
Tar questa conclusiun vegn ina delegaziun dal parlament da l'Uniun Europeica ch'è stada sin visita en Svizra. Ella apprezieschia dentant il progress tar l'imposiziun da taglia da concerns multi-naziunals.
Paul Tang di dentant era, che l'UE stoppia era guardar sin ils agens pajais. L'Irlanda, Luxemburg u ils Pajais Bass sajan era oasas fiscalas. Perquai dovria novas reglas ch'èn adattadas al 21avel tschientaner. Da quest avis sajan era represchentantas e represchentants da las federaziuns da cussegliaders da taglia, ch'èn s'inscuntrads cun Tang a Berna. Ellas na veglian betg valair sco «nursas nairas».
