La situaziun da quest onn è extraordinaria: Gia uss ha brischà en l'Europa dapli surfatscha da guaud che normalmain durant in entir onn.
Grezia
En la Grezia na piglian ils incendis nagina fin. Ils pumpiers han proclamà il segund aut stgalim da privel per la Grezia Centrala – il risico è là «fitg grond». Pertutgadas èn surtut la chapitala Athen e conturn sco era l'insla Euböa. Dentant er en las ulteriuras regiuns è il privel «grond».
En il nordost da la Grezia brischa quai il tschintgavel di en seria en il parc naziunal Dadia. 320 pumpiers sajan al lieu cun agid da sis aviuns e dus helicopters, scrivan las autoritads. Sustegn survegnan els er dal militar.
Las ultimas duas emnas han il pumpiers dumbrà mintga di passa 100 incendis e la sitgira cuntinuescha: Meteorologs annunzian temperaturas d'enfin 40 grads. Per part vegnan vitiers ferms vents che derasan vinavant il fieu – surtut sin l'insla Lesbos, nua ch'ins ha stuì evacuar la fin d'emna plirs vitgs. Tenor rapports da medias èn gia millis hectaras terren daventadas unfrendas da las flommas.
Spagna
Malgrà che la seria d'incendis cuntinuescha en Spagna, sa calma la situaziun entant in zic. Quitads fa dentant vinavant l'incendi da guaud sin l'insla Teneriffa. Là hajan las flommas gia destruì 24 kilometers quadrat, sco las autoritads regiunalas communitgeschan.
Per la Spagna è il 2022 l'onn d'incendis da guaud il pli devastant dapi l'entschatta da la registraziun. Fin uss han las flommas destruì dapli che 197'000 hectaras guaud, ha rapportà il sistem per l'observaziun da la terra Copernicus. Quai saja dapli che durant l'onn da record 2012. Tenor Copernicus saja la Spagna pertutgada quest onn il pli fitg d'incendis da guaud da tut ils stadis registrads en l'Europa. Quai avant la Rumenia (stgars 150'000 hectaras), il Portugal (bun 46'000), la Frantscha (stgars 40'000), la Croazia (radund 31'000) e l'Italia (bun 25'000 hectaras).
Frantscha
Per ils incendis a la costa da l'Atlantic han las autoritads speranza ed annunzian ch'il fieu a La Teste-de-Buch saja stizzà. Tut las abitantas ed abitants dastgan turnar en lur chasas.
Gia dapi dis furieschan ils fieus en il vest dal pajais. Entaifer in'emna èn brischadas en il sid da Bordeaux 20'600 hectaras terren, sco la prefectura per la Gironde ha communitgà la mesemna. Millis persunas avevan stuì bandunar lur chasadas.
Italia
En l'Italia han ils pumpiers nudà dals 15 fin ils 21 da fanadur passa 32'900 acziuns. Quai èn circa 4'000 dapli che l'onn avant. Il pli savens èn ils pumpiers stads en acziun sin la Sicilia ed en la Puglia. En il territori da cunfin da la regiun Friuli-Venezia Giulia ardan dapi plirs dis incendis da guaud. In grond incendi è era rut ora a Massarosa en la Toscana, nua che tschients persunas èn vegnidas evacuadas. Plinavant èn a Bibione, en il nord da l'Italia, pliras turistas e turists fugids da las flommas en la mar. La guardia costala ha pudì salvar els.
