A mez la part da la citad Miracle Mile sa chatta il terz museum da l’architect Peter Zumthor. Igl è ses pli grond project insumma. Ses facit curt e cnap:
Igl ha rendì.
Il project da 724 milliuns dollars saja stà dispitaivel gia dapi il cumenzament. In punct da critica: Zumthor ha survegnì l’incumbensa senza concurrenza. Mo era l’architectura ha offais tschertins damai ch’ella saja memia pesanta ed amorfa.
Plinavant saja Los Angeles ina citad pretensiusa quai che pertutga la construcziun urbana. Quai haja chaschuna bain inqual notgs senza sien a l'architect. Il bajetg da betun cun ina gronda front da fanestras è nunusità, ma era tipic per il Svizzer. Il betun da quest bajetg è restà senza tractament. Zumthor di:
Mintga chaprizi en il betun, tut vegn mantegnì. Quai plascha eba bain. Questas irregularitads, questa vita, quest material ch’ins senta.
Il spazi d’exposiziun cun surfatscha da 9'000 meters quadrats duai vegnir duvrada senza ierarchia. Quai vul dir che l'art mussà n’è betg preschentà suenter categorias. Nov sa maschaida cun vegl. A visitadras e visitaders na vegn betg dictà nua ch'ellas ed els ston ir atras.
La via crappusa dal project n’è betg in tema durant l’emna da l’avertura. L'architect cun renum vegn festivà – era da persunas prominentas. L’actura Rita Wilson di ch’ella saja in grond fan da Zumthor. Ella veglia gia daditg far ina visita en sia terma en Svizra. L’artist Jeff Koons di ch’i saja ina prestaziun grondiusa. Er il reschissur Wim Wenders parta quest’opiniun. «Igl è grondius.»