Siglir tar il cuntegn

Header

cuntegn

Politica da clima Svizra perda plaz en l'index da la protecziun dal clima

La Svizra è crudada enavos en la cumparegliaziun da stadis davart l'engaschi per la protecziun dal clima. Quella saja da nov mo pli sin plaz 15 – pia in pli bass che l'onn passà. Quai resulta dal rapport annual dal «Climate Change Performance Index» ch'è vegnì preschentà a la conferenza dal clima a Glasgow. Attribuì vegn quai surtut al Na da la populaziun a la lescha da CO₂ il zercladur passà.

En pliras categorias ha la Svizra pers:

  • En la politica dal clima generala haja la Svizra pers indesch rangs e saja ussa anc sin plaz 36 da l'index da la protecziun dal clima, hai num en il nov index dal clima.
  • En la politica dal clima naziunala croda la Svizra per 28 rangs sin plaz 51. La Svizra haja bain finamiras per il clima. Senza la lescha da CO₂ haja la via per cuntanscher las finamiras però largias, hai num en il rapport.
  • En la categoria da la politica da clima internaziunala attestescha il rapport a la Svizra però ina rolla activa sin nivel diplomatic, ed in grond engaschi per transparenza e mesiras per reducir gas nuschaivels al clima.
  • Tar las emissiuns da gas cun effect da serra vesa quai era ora meglier per la Svizra cun il rang 14 dal rating. Qua vegn attribuì a la Svizra efficacitad tar la reducziun da tals gas.
  • Tar il consum d'energia ranghescha la Svizra sin plaz 16,
  • tar l'energia regenerabla lura puspè sin plaz 23.

En general proponan ils experts che la Svizra duai giugar ina rolla pli ambiziusa.

L'index per la protecziun dal clima

Avrir la box Serrar la box

Per quest index cumpareglieschan las organisaziuns per la protecziun da l'ambient «Germanwatch» ed il «NewClimate-Institute» las prestaziuns da 60 stadis per la protecziun dal clima. Numnadamain quels 60 stadis ch'èn responsabels per 90% da las emissiuns da gas cun effect da serra sin l'entir mund.

Scandinavia sissum l'index

Las meglras notas ha survegnì il Danemarc, la Svezia e la Norvegia, suandads da la Gronda Britannia, il Marocco, Chile, India e Lituania. La Svizra ranghescha suenter la Finlanda, la Germania e Malta, però anc avant il Portugal, la Frantscha ed il Luxemburg.

audio
Per tadlar curt e cumpact
ord Novitads dals 09.11.2021.
laschar ir. Durada: 1 minuta 23 Secundas.
La Svizra na po betg esser loscha dal plaz 15. Ella avess la capacitad da giugar la rolla da precursura.
Autur: Georg Klingler Expert da clima tar Greenpeace CH

Organisaziuns da la protecziun da l'ambient betg cuntentas

Las ambiziuns da la Svizra per la protecziun dal clima sajan memia pitschnas, di l'expert da clima da Greenpeace Svizra e collavuratur tar il rating. La Svizra pudessia giugar la rolla d'exempel per auters stadis. Enstagl da reducir las emissiuns aifer il stadi, tschertgia la Svizra plitost pussaivladads da cumpensar las emissiuns en l'exteriur. Quai na mainia betg ad ina schliaziun da la crisa da clima.

RTR novitads 15:00

Artitgels legids il pli savens