Il candidat moderà Joe Biden gudogna en ils stadis federativs da Idaho, Mississippi, Missouri e Michigan, quai tenor las prognosas d’emetturs da televisiun. Nagina clera decisiun tranter Joe Biden e ses rival Bernie Sanders, vesan ils emetturs il mument per ils stadis Washington e North Dakota.
Uschia ha l’anteriur vicepresident Joe Biden pudì cuntinuar sia seria da victorias dal «Super Tuesday» avant in’emna. Cunzunt la victoria en il Michigan, in stadi industrial en il Midwest dals Stadis Unids da l'America, vala sco impurtant signal per la fermezza dals candidats.
Coronavirus fraina cumbat electoral
Entant han tant Joe Biden sco era Bernie Sanders renunzià ad occurrenzas d'elecziun, raschun è il coronavirus. Il mardi saira avevan omadus planisà occurrenzas en il stadi Ohio. Davart stritgar ulteriuras acziuns planisadas il proxim temp veglian els decider da cas tar cas, hai num.
