En la procedura per eventualmain relaschar il president american da ses uffizi, na vul Rudy Giuliani, l’advocat da Donald Trump, betg collavurar cun il congress. El na vegnia betg a metter a disposiziun documents en chaussa. El numna la procedura per ina pussaivla relaschada d'uffizi cunter Trump sco «cuntradicziun a la constituziun».
Las cumissiuns ch’investigheschan cunter il president en connex cun l’affera da l’Ucraina vulan infurmaziuns davart ils contacts da Trump cun l’Ucraina. Ils democrats en la chombra dals represchentants supponan che Giuliani ha vulì procurar material engrevgiant cunter il candidat per la presidenza, il democrat Joe Biden. Las investigaziuns da las cumissiuns cuntrafetschian a la constituziun, senza fundament e sajan illegalas, ha argumentà Giuliani. Er il vicepresident american, Mike Pence, refusescha da cooperar cun la chombra dals represchentants.
Ils democrats pretendan ina procedura da relaschar il president da ses uffizi. Al telefon haja Donald Trump intimà il president ucranais d’investigar encunter ses concurrent democratic Joe Biden e ses figl.
Ord l'archiv
El è davent dal schaner 2017 il nov numer dus en Chas'Alva a Washington – Mike Pence. Il vicepresident da Donald Trump è dentant tut in'autra persuna che ses schef.
RR novitads 06:00
