Dapi il zercladur va ina gronda part da la populaziun da Hongkong adina puspè sin via per demonstrar. Evocà quai moviment ha la nova lescha d'extradiziun che la scheffa da la regenza da Hongkong, Carry Lam ha vuli instradar. Sche quella lescha vegniss exequìda, muntass quai che suspectàds vegnissan expulsads da Hongkong sin la terra franca da la China. Quella lescha ha er motivà Tobias Brandner dad ir a demonstrar.
Jau sustegn quels protests, perquai che quai è ina schletta lescha che metta en prighel il sistem da democrazia a Hongkong.
Sco Tobias Brandner raquinta en l'intervesta na saja quai moviment da revolta betg vegni instradà dal sanesters mabain da glieud da fatschenta. Quai ord il motiv, ch'era els temevan inpau las consequenzas da quella lescha per lur affars.
Per far fatschentas a China ston ins esser inpau corrupts. Uschia temevan els, che sche quella lescha vegness realisada ch'els na pon betg pli far lur affars sco fin ussa.
Ma malgrà ch'i vegn demonstrà regularmain a Hongkong possian ins tuttina viver vinavant bain sco abitant da la citad, di Tobias Brandner. Tenor el vegnia la situaziun dramatisada inpau en las medias.
I n'è betg uschia sco sche la guerra rumpiss prest ora. Igl è anc adina ina atmosfera armonica ed ins na sto insumma betg avair tema.
RR actualitad 17:00