Tenor l'agentura da novitads statala da l'Iran è il demonstrant Mohsen Schekari vegnì executà. La sentenzia da mort è gia vegnida prelegida ils 20 da november. Persunas sentenziadas a la mort vegnan normalmain pendidas.
Schekari duai avair attatgà cun in cuntè in commember da la milissa da Basidsch, che sustegna la regenza. Plinavant haja el bloccà ina via. Tenor la dretgira revoluziunara fetschia quai culpant el dad avair «fatg guerra cunter Dieu».
Las emnas passadas hai dà pliras sentenzias da mort cunter demonstrantas e demonstrants. Organisaziuns per dretgs umans teman che dapli execuziuns suondan.
Suenter la mort da Mahsa Amini ils 16 da settember sin in post da polizia da l'urden moral, hai dà protests en l'entir pajais. Amini n'ha betg purtà in faziel da chau ed è perquai vegnida arrestada. La mort dad Amini sin il post da polizia n'è betg vegnida sclerida fin uss. Ils protests sa drizzan cunter l'oppressiun da dunnas e la regenza islamica da l'Iran.