Ils Stadis Unids han danovamain attatgà posiziuns dals rebels da Huthi en il Jemen. La mira saja stada in indriz da radar, uschia il militar american. Ordavant avevan ils Stadis Unids defendì lur attatgas sin il rebels davant il cussegl da segirezza da l'ONU. Quellas correspundian al dretg internaziunal ed a la Charta da l'ONU, uschia l'ambassadura americana.
La finamira da l'acziun militara saja stada d'impedir ch'ils rebels da Huthi cuntinueschian cun lur attatgas senza resguard sin bastiments da commerzi en la Mar Cotschna. La Russia e la China da lur vart han renfatschà als Stadis Unids ed a lur alliads da rinforzar las tensiuns en la regiun.
In expert da segirezza da la Scola politecnica federala ETH di envers SRF, ch'i na dettia betg ina legitimaziun dal dretg internaziunal per las acziuns. I na dettia betg ina decisiun da l'ONU, ed il Cussegl da segirezza da l'ONU haja bain condemnà las attatgas dals Huthis, n'haja dentant betg lubì acziuns militaras.
Dapi mez october attatgan ils Huthis navs en la mar cotschna. Els giustifitgeschan las attatgas cun la guerra en la Strivla da Gaza. Sco consequenza han societads da navigaziun cumenzà da guntgir or a la Mar Cotschna.
A Jemen ha furià durant onns ina guerra civila, involvidas èn sper ils rebels dals Huthis er stadas las pussanzas regiunalas sco l'Iran e l'Arabia Saudita.
