En vista a la chauma en raffinarias e deposits da carburant en Frantscha, ha la primministra Elisabeth Borne smanatschà cun ulteriuras obligaziuns da servetsch dal persunal necessari. Sche la situaziun restia er oz fitg tendida, vegnian ulteriurs lavurers sfurzads da far lur lavur, ha ditg la primministra en la televisiun.
Actualmain hajan radund 30 pertschient dals tancadis problems da provediment tar almain ina sort da carburant. Quai giaja memia lunsch. Borne ha pretendì envers ils emploiads dal concern d’energia «Totalenergies» d’acceptar la cunvegna en la dispita da tariffas enstagl da bloccar l’entir pajais.
La chauma cuzza gia trais emnas. Tenor la regenza èn trais da set raffinarias dal pajais e tschintg gronds deposits da carburant pertutgads.