Tgi che vul viagiar venderdi cun aviun direcziun Frantscha, sto quintar cun sgols che crodan or e retards. Gia a partir da la bun'ura vulan ils controlladers e las controlladras dal traffic aviatic en Frantscha far chauma per 24 uras. Diversas societads aviaticas han stritgà passa 1'000 sgols. Da questas annulaziuns èn er pertutgads intgins sgols da Turitg e Genevra en direcziun Frantscha.
Dapli paja e dapli persunal
Raschun per la chauma è ch'il sindicat «SNCTA» pretenda dapli paja pervi da l'inflaziun e la garanzia per dapli persunal ils proxims onns. Tenor il sindicat van tranter 2029 e 2035 in terz dals controlladers en pensiun. Perquai che la scolaziun saja pulit lunga, duvrassi l'onn proxim gia in plan per la nova generaziun.
Il sindicat ha gia annunzià ina segunda chauma per ils 28 fin ils 30 da settember.
