Siglir tar il cuntegn

Header

cuntegn

Reacziuns schefs da stadi Macron: «Afganistan na dastg betg daventar lieu per terrorissem»

L'Afganistan na dastgia betg puspè vegnir il lieu da refugi per il terorissem. Da quai ha il president franzos, Emmanuel Macron avertì. Per cumbatter quai ha el annunzià in'iniziativa ensemen cun ils partenaris europeics.

Era il primminister brit Boris Johnson ha ditg suenter in telefon cun Emmanuel Macron ch'el veglia discutar cun las grondas naziuns d'industria davart il futur da l'Afganistan. El avertescha medemamain ch'il pajais na dastga betg daventar lieu da terrorissem.

Plirs schefs da stadi han prendì posiziun ed er concedì sbagls

La chanceliera tudestga Angela Merkel ha ditg ch'els hajan valità sbaglià la situaziun. Cun els na manegia Merkel betg be la Germania mabain en general la cuminanza internaziunala. Las stentas dals ultims onns n'hajan betg purtà fritg. I na saja betg reuddì da purtar enavos la democrazia e la pasch en la societad afgana. Plinavant ha la chanceliera tudestga descrit la surpigliada da la pussanza sco situaziun «fitg pitra». Ella ha annunzià da gidar ils stadis vischins da l'Afganistan da prender si fugitivs. I giaja er persuenter da controllar il moviment da fugitivs en direcziun Europa.

La Germania, la Frantscha, ils Stadis Unids e la Gronda Britannia vulan repatriar ses burgais ed er gidanters afgans. Il president american Joe Biden ha danovamain defendì la retirada da las truppas americanas, malgrà ch'ils talibans han curt suenter surpiglià la pussanza. Er sche la schuldada americana fiss anc stada pli ditg en il pajais, n'avessia quai betg augmentà la veglia da cumbatter da las forzas da segirezza afganas. El saja cunter engaschis militars senza fin.

A la plazza aviatica da Kabul partan puspè aviuns d'evacuaziun

Entant cuntinueschan las evacuaziuns ord la chapitala Kabul puspè. Aviuns militars dals Stadis Unids e da la Germania sajan sa tschentads. Els hajan transportà forzas spezialas en la citad che duajan garantir la segirezza durant las evacuaziuns. Quai ha confermà il ministeri da defensiun a Berlin. Glindesdi suentermezdi è il manaschi vegnì interrut, perquai ch’adina dapli persunas èn curridas sin las pistas da partenza per pudair tiers in plaz en in dals aviuns.

audio
Per tedlar curt e cumpact
01:05 min, Actualitad dals 17.08.2021.
laschar ir. Durada: 01:05 minutas.

RTR novitads 06:00 +

Artitgels legids il pli savens

Scrollar a sanestra Scrollar a dretga