Dapi emnas eran sa cumbattids ils commembers da la regenza taliana per l’avegnir finanzial da l’Italia. Ils populists da las partidas da regenza Cinque Stelle e Lega vulevan accumplir las empermischuns ch’els han fatg a lur electurs e spargnar pli pauc – il minister da finanzas vuleva quietar ils martgads da finanzas internaziunals e reducir il deficit.
Populists han chatschà tras lur ideas
Uss sajan sa mess tras ils dus vice primministers Luigi Di Maio e Matteo Salvini cun sa cunvegnir sin ina finamira da deficit da 2,4% dal product naziunal brut per il 2021. Il minister da finanzas Giovanni Tria aveva proponi ina quota da 1,6%.
Martgads da finanzas teman ils debits da l'Italia
Ils martgads da finanzas han gia reagì sin la cunvegna. L’Euro ha pers sin il dollar. Il sectur da finanzas internaziunal temia ch’ils debits da l’Italia na sajan pli controllabels, scriva l’agentura da novitads Reuters. Fin ussa hajan ils martgads gì speranza ch’il minister da finanzas Tria saja capabel da tegnair en frain la generusadad da la regenza taliana.
Italia ha ina muntogna da debits
L’Uniun europeica UE pretenda dapi onns che l’Italia reduceschia ils debits. En relaziun cun ses product naziunal brut PNB ha l’Italia ils segund auts debits da tut l’UE. La cifra da las Talianas ed ils Talians povers saja sa triplada ils ultims diesch onns, scriva Reuters.
RR novitads 06:00
