Il cardinalprotodiacon Dominique Mamberti ha annunzià il «habemus papam» da la loggia principala dal dom da son Peder ed annunzià l'elecziun dal cardinal american Robert Francis Prevost. El vul sa numnar Leo XIV.
Là ha il nov papa fatg ses emprim pled e l'emprima benedicziun «urbi et orbi»: sco uvestg da Roma per sia citad («urbi») – e sco pontifex per tuts cartents e cartentas da la baselgia roman-catolica sin l'entir mund («orbi»). Quai cun l'appell che la pasch possia cuntanscher tuts e dapertut sin l'entir mund.
Impressiuns
-
Bild 1 von 6. Bildquelle: Reuters.
-
Bild 2 von 6. Cardinal Robert Francis Prevost – ussa papa Leo XIV. Bildquelle: SRF live.
-
Bild 3 von 6. Bildquelle: Reuters.
-
Bild 4 von 6. Bildquelle: SRF live.
-
Bild 5 von 6. Bildquelle: SRF live.
-
Bild 6 von 6. Bildquelle: Reuters.
Tgi è il nov papa Leo XIV?
Robert Francis Prevost ha savì baud ch'el vul deditgar sia vita a la baselgia roman-catolica. Gia cun 22 onns è el entrà en l'urden dals augustins, cun 25 onns ha el fatg il profess ed è s'obligà da viver ina vita sco pader. Robert Francis Prevost è naschì en ina famiglia catolica cun ina basa multiculturala.
Il bab, anteriur schuldà da la Navy, ch'aveva servì durant la Segunda Guerra mundiala, aveva ragischs franzosas e talianas. La mamma è stada ina bibliotecara d'origin spagnol. Pia las meglras premissas per pudair surviver pli tard en il Vatican pluriling.
Prevost – ha il papa ina colliaziun cun il Grischun?
Questa dumonda respunda Chasper Pult cun in cler Na. El è linguist ed ha guardà en il lexicon istoric danunder ch'il num Prevost deriva. La schlattaina Prevost saja ina fitg derasada che ha sias ragischs en Frantscha e pli tard lura era en l’Engalterra. Suenter sajan blers emigrads en l’America, ed il Robert Francis Prevost saja in da quels.
Il num Prevost è era derasà en l’Europa ed en Svizra, quai pudessan tenor Chasper Pult esser fugitivs da la Frantscha suenter las tensiuns en la baselgia – quai na saja dentant betg perscrutà a la fin. En Grischun han blers Prevosts il lieu da burgais en Bregaglia, a Vicosoprano dapi il 1326. Pli tard èn els er ids a Müstair, a Tusaun ed er a Ramosch.
L'origin dal num è latin e di «praepositus». Pia ina preposiziun. Tenor Chasper Pult è in Prevost in che vegn avant, pia ina persuna cun uffizis impurtants. Ins pudess dir ch’il Prevost era in administratur, in substitut u in superiur. Intginas famiglias èn atras quai era vegnidas ritgas, noblas ed impurtantas en Bregaglia. Ina posiziun dals Prevosts saja era stada en baselgia da trair en las impostas. Chasper Pult citescha buccas nauschas che hajan pretendì che en il Vatican saja la «santa botega», pia la baselgia che fa raps.
La conclusiun tar il num da papa Leo XIV è, ch'i na dat nagina colliaziun cun il Grischun. Il num deriva da l’Europa ed ils Prevosts american èn emigrads.
Sco missiunari en il Peru
Malgrà la vocaziun tempriva n'è Robert Francis Prevost betg sa cuntentà cun in studi da teologia, mabain ha l'emprim studegià matematica e filosofia avant da studegiar teologia a Chicago ed è sa spezialisà sin il dretg da baselgia.
Lura, suenter l'ordinaziun, è el ì sco missiunari a Peru, nua ch'el ha manà ina cuminanza a Trujillo en il nord dal pajais. Suenter il return en ils Stadis Unids ha el fatg ina carriera impressiunanta en ses urden fin al schef suprem dals Augustins da tut il mund. Er il Vatican è vegnì attent. Papa Francestg ha nominà el il 2014 uvestg da Chiclayo (Peru) e 5 onns pli tard fa el part da las autoritads en il Vatican - quell'autoritad ch'è responsabla per ils uvestgs ed il clerus.