Siglir tar il cuntegn

Header

cuntegn

Rumantschs a l'exteriur Turissem en Australia e Svezia

Imelda e Roman Cathomen, oriunds da la Surselva, mainan dapi 13 onns il «Camp Allambee» en l'Australia. Robin Wolf, oriund da l'Engiadina, organisescha viadis per ir a pestga en Svezia.

Bandunà: Camp Allambee l'Australia

Pervia da las restricziuns da corona na dastgan ils Sursilvans Imelda e Roman Cathomen betg beneventar gruppas cun dapli che diesch persunas. Las scolas han in scumond dad ir en camps. La fatschenta principala fa la famiglia Cathomen cun champs da scolas. Uschia ch'il Camp Allambee, 130 km en il sidost da Melbourne, e vid.

audio
Co statti cun turissem mundial – Imelda Cathomen en l'Australia
aus Actualitad vom 22.10.2021.
abspielen. Laufzeit 3 minutas 48 Sekunden.

Reservaziuns avess il champ ina massa. Las scolas hajan stuschà las reservaziuns sin il davos quartal da scola che fiss ussa. Dentant na sa nagin, cura che la clientella dastga puspè vegnir en il champ. Enfin la fin da l'onn fiss il champ plainischem.

La glieud fiss pronta da vegnir.
Autur: Imelda Cathomen Camp Allambee, Australia

Ma era sch'ils uffizis da sanadad e da las scolas lubeschian puspè champs e gruppas pli grondas, dovrian els en il Camp Allambee in mument da preparar tut per las gruppas grondas. Quai na giaja betg simplamain dad in di sin tschel. Era sch'i vegnia puspè lubì da far champs, vegnia a dar restricziuns che sajan da tegnair en. Mo sche la clientella dastgan puspè vegnir, vegnia finalmain a dar vita en il Camp Allambee.

Swisslodge en Svezia: finalmain puspè giasts

Ils davos dus onns ha Robin Wolf cun sia Swisslodge gì paucs giasts. Il bain puril dal 18avel tschientaner sa chatta en il vest da la Svezia. Ils giasts dorman en tipicas chamonas da lain cotschnas. La fatschenta principala èn turas da pestga. La clientella da Robin Wolf, oriund da l'Engiadina, vegn surtut da la Svizra. Ils pli blers perfin dal Grischun. Bleras gruppas han stuì annullar il viadi en Svezia, cunzunt perquai ch'ins na dastgava betg viagiar. Durant il temp da corona ha el magari gì giasts da la Svezia. Quels na vegnian dentant betg per pestgar, mabain quai saja surtut famiglias che vegnan per giudair la natira ed il ruaus. Per il proxim onn vesia dentant finalmain puspè or relativ bain en il cudesch da reservaziuns, di Robin Wolf.

audio
Co statti cun turissem mundial – Robin Wolf en Svezia
aus Actualitad vom 22.10.2021.
abspielen. Laufzeit 2 minutas 42 Sekunden.
Il cumenzament hai jau gì blers giasts da l'Engiadina ch'jau enconuscheva da pli baud. Nus n'avain betg fatg blera reclama, ma plaunet sa derasi. La gronda part da mes giasts èn Svizzers, schizunt Grischuns.
Autur: Robin Wolf Swisslodge, Svezia

RTR actualitad 07:00

Artitgels legids il pli savens

Scrollar a sanestra Scrollar a dretga