Siglir tar il cuntegn

Header

Navigaziun

Donald Trump arriva sin ina tribuna.
Legenda: Las retschas enturn Donald Trump sa svidan, almain quellas dals politichers. Keystone
cuntegn

Exteriur Saint Louis: Ultimas preparativas per il duel Clinton vs. Trump

Fertant ch’i va mo anc paucas uras enfin al segund duel da televisiun tranter ils dus candidats per il presidi american perda Donald Trump sustegn en las atgnas retschas. In video cun remartgas vulgaras para da custar char al candidat republican.

En paucas uras (02:00 temp svizzer) ha el lieu: il segund duel da televisiun tranter la candidata democrata Hillary Clinton ed il candidat republican Donald Trump per il presidi american.

Conway arriva.
Legenda: Kellyanne Conway, la scheffa da la campagna electorala da Donals Trump, ariva in sonda en il Trump Tower a New York. Keystone

Lavur minuziusa n'han betg mo da far quels che preparan il palc en la Washington University a Saint Louis. Era il team electoral da Donald Trump enturn la scheffa da la campagna, Kellyanne Conway, ha da dar tut per salvar l'image da ses candidat.

Il video cun ina seria da remartgas vulgaras da Donald Trump, publitgà ier da la «Washington Post», metta il candidat republican era sut pressiun considerabla or da las atgnas retschas.

Adina dapli republicans van sin distanza da Trump

Uschia era l'anteriur candidat republican per il presidi american John McCain. Ils 8 da november na vegnia Donald Trump betg a survegnir sia vusch, ha communitgà il senatur John McCain.Sin ses cedel da vuschar scrivia el il num d'in Republican che saja qualifitgà per l'uffizi.

Ina persuna vestgida da portg che tegna in placat.
Legenda: Ina persuna demonstrescha davant il Trump Tower a New York. Keystone

Tenor l’emettur da televisiun BBC han 15 da 54 senaturs republicans annunzià da betg eleger Donald Trump sco president american. Era il timun da la partida republicana ha crititgà Trump ma vegn tuttina a sustegnair el.

Condoleezza Rice pretenda ch'el sa retiria

Auters commembers prominents da la partida republicana - tenor il quint da la «Washington Post» dus tozzels - sco l’anteriura ministra da l’exteriur Condoleezza Rice van in pass pli lunsch e pretendan perfin che Trump sa retiria. Quel aveva bain s'exculpà anc al medem di per las remartgas vulgaras, dentant exclus da sa retrair.

RR novitads 06:00++