Siglir tar il cuntegn

Header

cuntegn

Sanadad publica WHO schlia stadi d'urgenza internaziunal tras Corona

La pandemia Corona na vala betg pli sco stadi d'urgenza internaziunal. Quai ha l'organisaziun mundiala per sanadad (WHO) decidì. Dapi radund in onn giajan las cifras survegliadas tendenzialmain engiu, ha ditg il schef da la WHO Tedros Adhanom Ghebreyesus. Sco raschun per quest svilup vesa la WHO l'immunitad che saja creschida en la populaziun – quai tant tras vaccinaziun sco era tras infecziun. Perquai ha ella decidì venderdi da schliar il pli aut stadi d'urgenza pussaivel ch'ha valì per la pandemia dal coronavirus.

Consequenzas concretas n'ha questa decisiun però betg, perquai che mintga pajais decida autonom davart eventualas mesiras da protecziun.

WHO quinta cun 20 milliuns mortoris tras la pandemia

Tenor la WHO sajan almain 20 milliuns persunas mortas sin l'entir mund sco consequenza dal coronavirus, ha cuntinuà Ghebreyesus. Ina cifra che munta radund il traidubel che las cifras schazegiadas enfin ussa. (Tenor las cifras da l'Uffizi federal per sanadad svizzer èn almain 14'000 persunas mortas tras la pandemia u sias consequenzas enfin il schaner 2023).

Il virus saja victorisà mo per il mument

Il virus Sars-CoV-2 na saja però betg victorisà, ha punctuà Ghebreyesus. El circuleschia vinavant en la populaziun e pudessia anc adina sviluppar variantas privlusas. Tenor la WHO tanschian per il mument però ils instruments ch'ils stadis hajan enta maun per cumbatter in tal cas, sch'el avess da capitar. Instruments sco vaccins e medicaments, però era mesiras da protecziun cun mascrinas, tegnair distanza e ventilar las stanzas.

RTR novitads 16:00

Artitgels legids il pli savens