- Ils stadis da l'UE han decidì novas sancziuns cunter l'anteriura republica sovjetica Biellorussia suenter l'atterrament sfurzà d'in aviun da passagiers a Minsk.
- Tenor in pledader dal president dal cussegl da l'UE, Charles Michel, na dastgan societads aviaticas bielorussas betg pli nizzegiar il spazi aviatic da l'UE e betg pli duvrar plazzas aviaticas en l'UE per partir u platgar.
- Vitiers duai dar sancziuns economicas supplementaras e la glista cun persunas ed interpresas che han gia in scumond d'entrar en l'UE vegn cumplettada.
«Il Cussegl d'Europa condemna instantamain l'atterrament sfurzà d'in sgol da Ryanair ils 23 da matg 2021 a Minsk (Bielorussia) e l'arrestaziun dal schurnalist Roman Protassewitsch e sia amia Sofia Sapega entras las autoritads bielorussas», stat en ina decleraziun dals schefs da stadi e regenza. Il blogger e sia partenaria stoppian vegnir laschads liber immediat.
Vitiers intimeschan els las societads aviaticas cun sedia en l'UE da guntgir il spazi aviatic da la Bielorussia. L'inscunter suprem da l'UE pretenda da l'organisaziun internaziunala per l'aviatica civila ICAO d'examinar urgentamain «l'incap senza paregl e betg acceptabel».
L'UE metta er sin glatsch investiziuns da radund trais milliardas euros. Ils daners na culian betg enfin che la Bielorussia, giaja puspè in curs democratic, ha ditg la presidenta da la cumissiun da l'UE, Ursula von der Leyen.
Er ils Stadis Unids vulan dumandar quint la Bielorussia.