L’affera da corrupziun entaifer il parlament d’Europa s’extenda. Sco medias rapportan, sajan dus ulteriurs parlamentaris vegnids arrestads a Brüssel respectivamain a Napoli. La procura publica renfatscha al Beltg Marc Tarabella ed al Talian Andrea Cozzolino d’avair acceptà daners da stadis terzs. Omadus politichers da la fracziun socialdemocratica refuseschan tut las renfatschas.
Suspectà che Qatar e Maroc han vulì influenzar decisiuns dal parlament
Gia durant il december ha la anterirua vicepresidenta Eva Kaili perdì lur post pervia dal scandal. Er ella è vegnida suspectada d'esser corrupta. Sin quai han bleras medias fatg endament che Eva Kaili aveva pledà en favur dals campiunadis contestads a Qatar avant che quels avevan prendì lieu.
Encunter Kaili ed ulteriuras persunas intercurescha uss la giustia. Tranter auter datti suspects da participaziun ad ina organisaziun criminala, lavada da daners e corrupziun.
Tarabella e Cozzolino èn gia stads durant il december en la mira dal public. L'entschatta dal favrer han els perdì lur immunitad sco parlamentaris. Uschia pon els uss vegnir persequitads penalmain.
