La dumengia saira aveva Horst Seehofer (69) para annunzià en ina sesida da la direcziun da la partida a München da sa vulair retrair l'onn proxim da ses post sco president da la partida CSU.
Durant tut l'avantmezdi era lura vegnì speculà, cura che Seehofer sa decleria sez e co ch'i saja cun l'uffizi sco minister da l'intern tudestg. Igl era vegnì spetgà ch'el infurmescha la publicitad entaifer quest'emna da ses plans. Quai è uss succedì a l'ur dad in'occurrenza en la citad tudestga da Bautzen:
Jau vegn a demissiunar sco schef da la partida da la CSU. Questa decisiun è fatga. – Jau sun minister da l’intern tudestg e vegn a far quai er vinavant.
Tar in di da partida extraordinari il cumenzament dal 2019 duaja vegnir tschernì in successur u ina successura da Seehofer a la testa da la CSU.
Suenter Merkel uss er Seehofer
Exact avant duas emnas aveva er la chanceliera tudestga Angela Merkel (CDU) annunzià da betg pli vulair far politica: Ella sa retiria dal post sco presidenta da la CDU e na candideschia betg pli per in'ulteriura perioda da legislatura sco chanceliera, aveva ella annunzià ils 29 d’october 2018.
Sia annunzia era vegnida il di suenter la terrada tar las elecziuns en il Bundesland Hessen. La CDU ha gia da tscherner il december 2018 ina successura u in successur per sia presidenta da partida.
RR novitads 06:00
