India, il segund-grond producent da graun dal mund, n'exportescha a partir dad immediat betg pli graun a l’exteriur. Contracts existents vegnian dentant anc ademplids. Cun questa mesira veglia la regenza far frunt a l’augment dals pretschs da graun en l'agen pajais. Tras quest aut pretsch saja la segirezza da victualias en en privel. Quai ha communitgà la regenza a Neu-Delhi.
25 milliuns tonnas graun bloccads en l'Ucraina
Pervi da la guerra en l’Ucraina èn ils exports da graun da l’Ucraina e da la Russia, che tutgan omadus tar ils pli gronds producents da graun dal mund, ids enavos marcantamain. 25 milliuns tonnas graun sajan bloccadas en ports ucranais. Cunzunt blers pajais en l’Africa ed il Proxim Orient dependan tenor l’ONU dal graun bunmartgà da l’Ucraina. Per quest motiv han blers cumpraders uss mess lur focus sin l’India ch’è il segund-grond producent da graun dal mund suenter la China. India producescha radund 100 milliuns tonnas graun per onn.
Fomaz en bleras parts dal mund
Er il president ucranais Wolodimir Selenski ha avertì da fomaz en bleras parts dal mund pervi da l'invasiun da la Russia. Perquai pretenda Selenski da la cuminanza internaziunala d'augmentar il squitsch sin il president russ Wladimir Putin.
