Siglir tar il cuntegn

Header

audio
Tge resta da quests ultims dis a Londra? – facit persunal da Selina Chistell
Or da Actualitad dals 14.09.2022.
laschar ir. Durada: 5 minutas 55 Secundas.
cuntegn

Selina a Londra 1 meter e 60 na tanschan betg per vesair il retg

Igl è vegnì tut surura: ch’in mortori sa lascha betg planisar n’è bain nagina surpraisa – en quest cas vala il medem er sch’igl è chaussa roiala. Ma sch’i ha num uschè surura da pachetar la cofra ed ir en intginas uras a la plazza aviatica, lascha quai schon suar in zic – almain mai. E sch’ins pretenda gugent ch’ins saja ina persuna spontana, è quai probabel in tal mument ch’igl è da mussar questa spontanitad. Ditg e fatg – zack ses’jau en l’aviun en direcziun Londra. En la cofra il microfon, soccas per stgamiar ed intginas mini-turtinas da nusch. Wenn schon denn schon sch’ins banduna schon ina giada la Rumantschia.

En ina scufla surreala

La mort da la Queen è omnipreschenta en la chapitala englaisa, dapertut vegn commemorà a la monarca. Ma quai è be l’entschatta da mia aventura en ina scufla in zic surreala. Che blers sin l’insla aman lur regina è stà cler, er ch’i vegnia a dar in zic dapli fullas che a la festa da Cuira n’ha betg fatg surstar.

Da las colonnas, fullas da persunas, da las quantitads da flurs sun jau stada cumplainamain surprendida. Insumma, questas flurs, flurs nua ch’ins guarda, cun ir tras il Green Park vegniva magari in’unda encunter che savurava sco en ina stizun da flurs. Creschan quellas insumma sin l’insla u ston quellas vegnir impurtadas da l’Ollandia? Basta, uss senza far skerzs: impressiunada na sun jau betg mo stada da las massas da flurs mabain cunzunt cun tge respect ch’ils Brits e las Brittas discurran da «lur» regina, els stiman sia lavur prestada ed èn fascinads da quella dunna ch’ha purtà passa set decennis la curuna.

Dal mument ch’ins metteva in pass direcziun palast roial ma sentiva jau sco en ina scufla surreala, grondas bandieras da la Gronda Britannia, polizia sin chavals e la massa da glieud, da la dunna pli passada en sutga da rodas cun rosas sut bratsch enfin tar il buobet che plazzescha per terra sia pitschna ovra d’art zambregiada sez. Tuts paran unids – almain en quest temp extraordinari ed en questa scufla surreala.

Rumantsch e betg be British English

Sper ils Brits hai jau pudì inscuntrar persunas rumantschas che vivan a Londra. Uschia p.ex. Anna Lee Famos, l’Engiadinaisa ch’è gia dapi 60 onns en la chapitala englaisa ed è stada la guida ideala. Ma er cun ina quasi indigena èsi stà tut auter che simpel da chattar ina via svelta tras las colonnas e per suenter vesair insatge da la proclamaziun dal nov retg Charles ubain schizunt da vesair The King himself, forsa per intginas secundas, u almain in batterdegl.

Per nus duas ch’essan omaduas betg las pli grondas definitivamain ina sfida, cun tanta glieud n’ha er tut il sa stender e sa volver gidà nagut – 1,60m na tanschan simplamain betg per vesair il retgs. Uschia na savain er betg pretender d’avair vis il nov retg malgrà che quel è charrà en in’auto enfin al Buckingham Palace be paucs meters davent da nus duas. Pudair pretender quai n’è dentant betg il pli impurtant, l’impurtant è stà da transportar in zic da l’atmosfera da Londra sin undas rumantschas. E per la guida britannic/engiadinaisa hai dà sco engraziament las mini-turtinas da nusch.

RTR actualitad 12:00

Artitgels legids il pli savens